Héraðssaksóknari hefur ákært mann fyrir að hafa á heimili sínu og þáverandi sambýliskonu sinnar ljósmyndað rass og kynfæri hennar eftir að hafa dregið nærbuxur hennar frá. Mun þetta hafa verið gert meðan hún svaf og þannig bersýnilega án hennar samþykkis. Að mati saksóknara varðar þetta við 1. mgr. 199. gr. almennra hegningarlaga. Þar segir: „Hver sem útbýr, aflar sér eða öðrum, dreifir eða birtir myndefni, texta eða sambærilegt efni, þ.m.t. falsað efni, af nekt eða kynferðislegri háttsemi annars manns án hans samþykkis skal sæta sektum eða fangelsi allt að 4 árum.“
Saksóknari gerir þær kröfur í málinu að maðurinn verði dæmdur til refsingar og greiðslu alls sakarkostnaðar. Þá gerir fyrrum sambýliskona mannsins einkaréttarkröfu um að hann greiði henni þrjár milljónir í miskabætur.
Málið var þingfest í Héraðsdómi Reykjaness í vikunni og fer nú sína leið í dómskerfinu. Ekki liggur fyrir hvort ákærði hafi tekið afstöðu til ákærunnar við þingfestingu.
