Brotist var inn í lúxusvöruverslunina Attikk við Laugaveg 90 í morgun, kl. 6:19. Voru töluverð skemmdarverk eftir innbrotið og einhverju stolið. Starfsmenn Attikk eru að meta tjónið.

Meðfylgjandi eru myndir frá vettvangi.

DV ræddi stuttlega við Ýr Guðjohnsen, framkvæmdastjóra Attikk og fékk þær upplýsingar að einn aðili hafi þegar verið handtekinn vegna innbrotsins. Ekki er ljóst hvort fleiri voru að verki. Að sögn Ýrar er augljósasta tjónið útihurð verslunarinnar sem þarf að skipta um. Attikk birti eftirfarandi fréttatilkynningu vegna málsins:

„Klukkan 06:19 í morgun, fimmtudaginn 11. ágúst, var brotist inn í verslun Attikk að Laugavegi 90. Þjófarnir brutu sér leið í gegnum aðalhurð verslunarinnar og fór þjófavarnarkerfi í gang samtímis. Auk þess sem allt atvikið náðist á upptöku með hágæða öryggismyndavélakerfi sem Attikk nýtir. Á myndbandinu sjást tveir einstaklingar brjóta sér leið inn, valda gríðarlegum skemmdum á læstum skápum í versluninni og taka með sér eitthvað af verðmætum.

Starfsmenn Attikk eru sem stendur að meta tjónið og fara yfir hvaða vörum var stolið og/eða urðu fyrir skemmdum í innbrotinu. Þetta gæti orsakað skertan opnunartíma í versluninni í dag. Attikk selur lúxus merkjavörur frá merkjum eins og Louis Vuitton, Chanel, Gucci, Prada og mörgum fleirum fyrir hönd þriðja aðila.

Við biðjum alla eigendur vara hjá Attikk að sýna biðlund á meðan starfsfólk metur tjónið. Allar vörur hjá Attikk eru tryggðar fyrir innbroti að þessu tagi og munu eigendur viðkomandi vara fá tjónið bætt. Eigendur þeirra vara sem var rænt eða urðu fyrir tjóni munu fá skilaboð frá Attikk þess efnis á næstu dögum.“