Gyða Jóhannsdóttir, fyrrverandi dósent við Menntavísindasvið Háskóla Íslands og fyrrverandi skólameistari Fósturskóla Íslands, lést þann 24. júlí síðastliðinn. Hún var 78 ára gömul.
Rektor Háskóla Íslands, Jón Atli Benediktsson, greinir frá þessu í Facebook-færslu.
Gyða fæddist í Reykjavík árið 1944, varð stúdent frá M.R. árioð 1964 og stundaði háskólanám í uppeldisfræðum og sálfræði í háskólum í Svíþjóð, Bandaríkjunum, Danmörku og Svíþjóð.
Rektor segir Gyðu hafa verið frumkvöðul og hugsjónakonu um eflingu háskólamenntunar og voru rannsóknir hennar einkum á því sviði. Í störfum sínum við Kennaraháskóla Íslands og Háskóla Íslands ritaði Gyða fjölda fræðigreina, bæði ein og sem meðhöfundur, þar sem hún rannsakaði m.a. þróun æðri menntunar á Íslandi í samanburði við Norðurlöndin.
Nánar má lesa um lífshlaup og feril Gyðu með því að smella á tengilinn hér fyrir neðan.
