Talið er líklegast að eldgosið sem núna er yfirvofandi á Reykjanesskaga verði á svæði sem er austan og norðaustan við Fagradalsfjall. Liggur það svæði til norðausturs frá eldstöðvunum í Geldingardölum þar sem gaus í fyrra og í átt að Keili.

Gjósi á þessu svæði gæti hraun annað hvort runnið til suðurs í átt að Suðurstrandarvegi eða til norðurs í átt að Reykjanessbraut og Faxaflóa.

DV sendi fyrirspurn til Almannavarnardeildar Ríkislögreglustjóra um hve langan tíma sé talið hraunrennsli gæti tekið til að ná Reykjanesbraut ef straumurinn liggur í þá átt. Í svari Almannavarna kom fram að fyrirhugaður er vísindaráðsfundur í dag þar sem farið verður yfir sviðsmyndir og hraunrennslislíkön. „Í þessu samhengi er mikilvægt að hafa í huga að þær sviðsmyndir sem unnið hefur verið með benda til þess að tími frá því að gos hefst og þar til hraun nær vegum er áætlaður í dögum eða vikum,“ segir í svari Almannavarna.

Samkvæmt því gæti hraun, í versta falli, náð Reykjanesbraut nokkrum dögum eftir eldgos.