Brimborg ehf. þarf ekki að greiða Rekstrarfélagi Hafnartorgs rúmar fimmtíu þúsund krónur í sektir samkvæmt nýföllnum dómi Héraðsdóms Reykjavíkur. Deila félaganna snerist um hvort að Brimborg, sem rekur meðal annars bílaleigu, bæri ábyrgð á því að greiða fyrir þá viðskiptavini sem fengu sektir í bílastæðahúsi Hafnartorgs og slepptu því að greiða þær.
Rekstrarfélagið krafðist þess að Brimborg bæri ábyrgð á því að greiða ógreidd gjöld þessara viðskiptavina sinna fyrir notkun á bílastæðum í húsinu, en til viðbótar við afnotagjöldin er rukkað 1.800 króna innheimtukostnaður á hvert mál. Um var að ræða 23 skipti þar sem viðskiptavinir Brimborgar hlupu frá sektum sínum en öll tilvikin áttu sér stað árið 2019. Heildar upphæð sektanna sem Brimborg neitaði að borga nam því 52.499 krónum.
Það sem gerði í raun útslagið í málinu var að í leiguskilmálum Brimborgar kemur fram að leigutakar beri ábyrgð á öllum helstu sektum og því neitaði fyrirtækið að borga sekt Rekstrarfélagsins enda hefði félagið ekkert um það að segja hvað leigutakarnir gerðu á bílunum á leigutímanum. Rekstrarfélagið væri að rukka rangan aðila og þyrfti að ganga á eftir hverjum ökumanni fyrir sig.
Héraðsdómur úrskurðaði að lokum að Brimborg bæri ekki ábyrgð á því að greiða sektir viðskiptavina félagsins og var félagið því sýknað af kröfunni. Rekstrarfélag Hafnartorg þurfti auk þess að greiða Brimborg 750 þúsund krónur í málskostnað vegna málsins.
