Fréttablaðið skýrir frá þessu í dag. „Sem betur fer hefur ekki verið gerð nein árás en það hafa verið mjög ógnandi tilburðir þar sem fólk hefur verið hrætt,“ er haft eftir Svanberg Sigurgeirssyni, deildarstjóra ökuprófa hjá Frumherja. Öryggishnöppum hefur verið komið fyrir hjá prófdómurum fyrirtækisins í ökuprófum.
Árlega þreyta um fimm þúsund manns skrifleg ökupróf hjá Frumherja. Flestum gengur vel að sögn Svanbergs en öðrum síður. Stundum hafi viðbrögðin við falli á prófi verið ógnandi og jafnvel ofbeldisfull. „Við höfum séð á eftirlitsmyndavélum að það hefur alveg legið við að það hafi verið rokið í prófdómarann. Það hefur ekkert annað verið eftir en að ráðast á prófdómarann – það hefur verið komið á það stig,“ sagði hann.
Hann sagði að ekki sé um sautján ára krakka að ræða sem bregðist svona við, heldur fyrst og fremst fullorðna karla en meirihluti prófdómaranna eru konur. „Þó að maður sé kannski hræddur við að segja það þá er þetta eiginlega mest bundið við útlendinga. Við verðum sérstaklega vör við þetta frá löndum þar sem menningin er þannig að konur eru skörinni lægra í stiganum heldur en karlmenn. Þeir líta á niður á konur, sérstaklega ef þær eru að segja þeim eitthvað sem þeim líkar ekki,“ sagði Svanberg sem sagði að staðan breytist oft þegar karlmaður úr starfsliðinu kemur inn í stofuna þar sem kvenkyns prófdómara er ógnað.
