Dagurinn hefur verið tengdur sterklega við stríðið í Úkraínu því margir telja að þegar Pútín ávarpar þjóð sína þennan dag vilji hann geta sagt henni að sigur hafi unnist í Úkraínu í þeirri „sérstöku hernaðaraðgerð“ (eins og rússnesk yfirvöld kalla stríðið) sem þar er í gangi.
CNN segir að nú velti sífellt fleiri því fyrir sér hvort Pútín muni lýsa yfir stríði gegn Úkraínu í stað þess að lýsa yfir sigri. Ástæðan er að hernaður Rússa hefur ekki skilað þeim árangri sem þeir stefndu að og hafa þeir raunar beðið afhroð á mörgum sviðum stríðsins.
Ef Pútín lýsir yfir stríði getur hann virkjað allan rússneska herinn og kallað varaliðshermenn til herþjónustu.
Jacob Kaarsbo, sérfræðingur hjá dönsku hugveitunni Tænketanken Europa og fyrrum sérfræðingur hjá leyniþjónustu danska hersins, vék að þessu í færslu á Twitter. Þar sagði hann að mikið væri rætt um hvort Pútín muni lýsa yfir stríði og hefji almenna herkvaðningu þann 9. maí. „Það gerist kannski og kannski ekki. Það er öruggt að segja að það feli í sér mikla áhættu fyrir Pútín. Af hverju?“ spyr hann síðan sjálfan sig og kemur síðan með svarið:
„1) Í því felst viðurkenning á að hin „sérstaka hernaðaraðgerð“ sé misheppnuð en hún hefur verið mjög vel heppnuð þegar stjórnvöld hafa skýrt frá henni. 2) Hvert væri markmiðið með stríði? Að leggja alla Úkraínu undir sig? Stríð gegn Úkraínumönnum? Það væri erfitt að skilgreina umfangið.“
Við þetta bætir hann síðan að það muni taka marga mánuði að gera rússnesku hermennina reiðubúna til orustu og tryggja að nauðsynlegur búnaður sé til staðar. „Rússnesku hersveitirnar í Úkraínu verða hugsanlega orðnar örmagna þegar þarna kemur og hafa verið hraktar aftur á bak,“ skrifar hann og bætir við: „Þegar allt kemur til alls vil ég ekki útiloka að Pútín lýsi yfir stríði en það er einnig líklegt að hann geri það gagnstæða. Ef Pútín gerir þetta (lýsir yfir stríði, innsk. blaðamanns) felur það mikla áhættu í sér og getur orðið honum að falli.“
