Rocio Berta Calvi Lozano var sakfelld í Héraðdómi Reykjavíkur í dag fyrir að féfletta tvær heilabilaðar systur á tíræðisaldri. RUV greinir frá.

Hún hlaut tveggja ára skilorðsbundinn fangelsisdóm vegna umboðssvika og féflettingu og þarf að greiða upptökukostnað upp á samtals tæplega 76 milljónir króna.

Aðalmeðferð málsins fór fram í mars. Rocio var meðal annars sökuð um að hafa ráðstafað tæplega 80 milljónum króna af bankareikningum systranna í eigin þágu.

Sjá einnig: Vitni draga upp óhuganlega mynd í máli heilabiluðu systranna – Síminn tengdur öðrum síma, dyrabjallan aftengd og öryggismyndavél á heimilinu

Systurnar umræddu eru fæddar árið 1928 og 1929 og eru báðar ógiftar og barnlausar. Þær áttu þó töluverðar eignir, meðal nokkrar íbúðir í Reykjavík. Yngri systirin var lögð inn á hjúkrunarheimili árið 2006 og fékk þá eldri systur sinni umboð til að sinna fjármálum hennar. Sú eldri veitti svo Rocio umboð til að fara með sín fjármál árið 2012, sem og umboð fyrir yngri systur sína.

Rosio var í dag sakfelld í fjórum liðum ákærunnar en sýknuð í tveimur. Hún var sakfelld fyrir umboðssvik vegna beggja systranna og snýr meginkostnaðurinn að skaðaótum í máli yngri systurinnar. Hún var sýknuð í ákærulið um misbeitingu erfðaskrár, vegna sönnunarskorts, og gripdeilda af sömu ástæðu.

Sjá einnig: Ævintýraleg ákæra – færslurnar lýsa lúxus lifnaði

Í ákærunni kom fram að yngri systirin hafi búið og starfað í Bandaríkjunum stóran hluta ævi sinnar en flutt aftur til Íslands árið 2006 og verið lögð inn á heilbrigðisstofnun vegna heilabilunar. Einnig kemur fram að erfitt hafi reynst að taka skýrslu af systurinni árið 2017 þegar fyrst vöknuðu grunsemdir um meintan fjárdrátt. Yngri systirin tapaði fljótt þræðinum svo skýrslutakan varð að engu.

Fyrstu grunsemdir um heilabilun eldri systurinnar komu fram árið 2011 þegar hún mætti ekki í minnispróf. Árið 2017 kom í ljós að hún var alzheimer-sjúkdóm á háu stigi. Rannsakendur gerðu tilraun til að taka skýrslu af henni 2017 vegna grunsemda um fjárdrátt en hún gat ekki haldið uppi almennum samræðum segir enn fremur í ákærunni.

Systurnar eiga engin börn svo auðveldara reyndist að halda meintum fjárdrætti undir yfirborðinu fyrir þeim er tengdust systrunum. Það var því fyrst fyrir þremur árum að grunnsemdir vöknuðu hjá ættingjum kvennanna.