Ben Wallace, varnarmálaráðherra Bretlands, telur að Rússar hafi misst allt að 580 skriðdreka í stríðinu í Úkraínu. Ein af ástæðunum fyrir þessu mikla tjóni er hönnunargalli á rússneskum skriðdrekum en vestrænir herir hafa vitað af honum áratugum saman.

CNN skýrir frá þessu. Þessi hönnunargalli snýst um hvernig skotfæri eru geymd í turninum á skriðdrekunum. Hann hefur í för með sér að meira að segja minniháttar árás á skriðdreka getur valdið keðjuverkun sem verður til þess að skotfæralagerinn springur og við það springur turninn og þeytist af.

Dæmi um þetta má sjá víða í Úkraínu þar sem rússneskir skriðdrekar liggja eins og hráviði.