Í dag var tilkynnt að Bankasýsla ríkisins yrði lögð niður vegna sölunnar á Íslandsbanka, það sé gert til að hægt sé að tryggja betur gagnsæi, traust og upplýsingagjöf til almennings. Katrín Jakobsdóttir var gestur í Kastljósi í kvöld til að ræða tilkynningu ríkisstjórnarinnar um þessa niðurlagningu og önnur viðbrögð við sölunni á Íslandsbanka.

Í upphafi þáttarins var Katrín spurð hver ber ábyrgð á mistökunum við söluna ef það er ekki ríkisstjórnin. Katrín svaraði því með miklum pólitíkusarbrag, fór yfir ferlið á fyrri sölunni og svo seinni sölunni. Hún benti á að aðferðin sem notuð var í seinni sölunni sé þekkt á alþjóðavettvangi en að henni hafi aldrei verið beitt hér á landi áður.

„Þá ber að hafa í huga að það eru ákveðnar meginreglur sem þarf að hafa í huga þegar verið er að höndla með eignarhluta í almannaeigu, meðal annars-“ sagði Katrín áður en Sigríður Dögg Auðunsdóttir, stjórnandi Kastljóss, tók fram í fyrir forsætisráðherra og benti henni á að hún væri ekki að svara spurningunni um ábyrgðina. „Má ég stoppa þig, nú erum við að spyrja þig nákvæmlega um ábyrgðina ykkar, þú þarft ekki að fara yfir forsöguna,“ sagði Sigríður.

Í kjölfarið sagði Sigríður að það væri búið að fara nógu oft yfir forsöguna, svo sagði hún að ábyrgðin væri ríkisstjórnarinnar en ekki Bankasýslunnar. „Ég held að það sé nú full ástæða til að fara yfir þetta ferli því tilboðsferlið, sem ég var að fara yfir, það þarf auðvitað að fara eftir þessum meginreglum sem er fjallað um í þessum lögum sem ég nefni – sem eru meðal annars einmitt gagnsæi og jafnræði.“

„Þegar að þessi ákvörðun er tekin, að ráðast í þetta ferli, þá er það að sjálfsögðu á ábyrgð ríkisstjórnar og fjármálaráðherra að taka þá ákvörðun. Það liggur algjörlega fyrir og enginn neitar því.“

Katrín segir svo að framkvæmd ferlisins sem var ákveðið að ráðast í hafi ekki staðið undir væntingum.