Auðunn Lúthersson, sem gengur undir listamannsnafninu Auður, einn helsti popptónlistarmaður þjóðarinnar þar til honum var slaufað á síðasta ári vegna þrálátra ásakanna um kynferðisofbeldi, stígur fram í viðtali við Stöð 2 í kvöld og lýsir því hvernig hann hefði unnið í sínum málum og gert upp við þolendur sína.
Þrálátur orðrómur og ásakanir um meint kynferðisofbeldi Auðs urðu sífellt háværari síðastliðið vor. Þann 7. júní 2021 greindi DV frá því að Þjóðleikhúsið væri með ásakanir á hendur Auði til skoðunar en hann var þá að sinna verkefnum hjá leikhúsinu. Sagði Þjóðleikhúsið síðan upp verkefnasamningum við hann. Stuttu síðar dró Auður sig í hlé frá sviðsljósinu með yfirlýsingu á Instagram þar sem hann gekkst við ofbeldi gegn einni konu árið 2019. Sagðist hann ætla að vinna í sjálfum sér.
Í viðtalinu við Stöð 2 segir að allar sögusagnir um ofbeldi hans séu ekki réttar. Til dæmis harðneitar hann að vera viðriðinn svokallaða þöggunarsamninga.
„Það er í grunninn munur á því að trúa þolendum og trúa orðrómum. Ég get ekki tekið við því sem er algjörlega ósatt. Ég vil miklu frekar, bæði hér og í lífi mínu, axla ábyrgð á þeirri hegðun sem ég ber ábyrgð á. Særandi og óþægileg, ég hef verið að fara yfir mörk, og ég hef verið meiðandi í minni hegðun. Ég hef ekki gert mér almennilega grein fyrir henni en ég samt ber algjörlega ábyrgð á henni,“ segir Auður í viðtalinu.
Í viðtalinu segist Auður hafa farið í gegnum mikla sjálfsvinnu, meðal annars sálfræðimeðferð. Ennfremur hafi hann snúið baki við áfengi.
