Svona lýsti 33 ára kona frá Brovary, nærri Kyiv, þeim hryllingi sem hún varð fyrir af hálfu rússneskra hermanna. Þetta sagði hún í samtali við The Times. Þetta gerðist þann 9. mars og er málið til rannsóknar hjá úkraínskum yfirvöldum sem rannsaka það sem stríðsglæp.
Síðasta sunnudag bárust fregnir af nauðgunum og fjöldamorðum í bænum Bucha en þar fundust mörg hundruð lík eftir fimm vikna hernám Rússa.
Fréttir af nauðgunum rússneskra hermanna á úkraínskum konum eru ekki fyrstu fréttirnar sem berast af nauðgunum í stríði. Slíkar fréttir heyrast reglulega frá stríðshrjáðum svæðum. Í stríðinu á Balkanskaga á tíunda áratugnum var 60.000 konum nauðgað að mati SÞ og í Rúanda var 250.000 konum nauðgað í þjóðarmorðinu sem þar átti sér stað.
Jótlandspósturinn hefur eftir Robin May Schott, sem vinnur við rannsóknir á kyni og stríði hjá Dansk Institut for Internationale studie, að margar skýringar séu á af hverju hermenn nauðga.
Hún sagði að það verði að fara varlega í að líta á nauðganir í stríði sem eitthvað sem einstaklingur taki sjálfur ákvörðun um, það séu aðrir hlutir sem ráði. Hún varar einnig við að gengið sé út frá því að stríð hafi alltaf nauðganir í för með sér.
Hún sagði að nauðganir séu hluti af hræðslustjórnun sem er hægt að beita almenning á stríðstímum. Þetta sé grimmdarverk þar sem sé gengið mjög nærri fórnarlambinu og það og gerandinn séu í miklu návígi.
Hún sagði að sú menning, sem er í hernum, skipti einnig máli ef valdaskipting sé mjög mikil, og það sé áhersla á yfirdrifna og árásargjarna karlmennsku: „Það gæti verið þannig í rússneska hernum. Það hafa komið upp dæmi um kynferðisbrot í bandaríska hernum og hér í Danmörku hafa konur, sem hafa verið í hernum, skýrt frá kynferðisofbeldi og kynferðislegri áreitni.“
Hún sagði að í dæminu frá Brovary virðist hafa verið um hópnauðgun að ræða og það sé ekki óalgengt í stríði: „Oft eru nauðganir ekki skipulagðar, þetta er eitthvað sem gerist í tengslum við allt annað ofbeldi sem á sér stað í stríði. Af því að mikil áhersla er lögð á bræðralag í hernum endar það oft með að margir taka þátt því þeir eru hræddir við að ganga gegn félögum sínum.“