Búið er að bera kennsl á konuna sem er á einni af átakanlegust ljósmyndum stríðsins í Úkraínu. Myndin er af einu fórnarlambanna í Bucha í Úkraínu og sýnir útbreydda, lífvana hönd með áberandi rauðar og bleikar neglur. Myndin var meðal fjölda ljósmynda sem dreift hefur verið á samfélagsmiðlum og sýna hryllinginn sem rússneskar hersveitir hafa valdið í bænum. Anastasia Subacheva, förðunarfræðingur frá nágrannabænum Gostomel, þekkti strax einkennisneglur vinkonu sinnar, hinnar 52 ára Iryna Filkina. Filkina var einnig upprennandi förðunarfærðingur sem átt fjölda kennslumyndbanda um förðun á samfélagsmiðlum. Dóttir hennar, Olha Shchyruk, hafði flúið Bucha við innrás Rússa en móðir hennar varð eftir.
Subacheva sagði í viðtalið við bandaríska miðilinn Times að Filkina hefði dreymt um að skapa sér lifibrauð með förðunarmyndböndum á Instagram og leitað til hennar til að móta útlit sitt og stíl. Subacheva sagði Filkina hafa verið afar spennta fyrir komandi tónleikum og viljað líta sérstaklega vel út.
Filkina vann í orkustöð og var að hjóla heim úr vinnunni þegar hún var skotin til bana af rússneskum hermönnum þann 5. mars síðastliðinn. Lík hennar fannst við hlið reiðhjólsins við vegakant og voru hendur hennar útréttar.
,,Þegar ég sá myndina brotnaði hjarta mitt,” sagði Subacheva við blaðamann Times.
Olha Shchyruk, dóttur, Filkina, var sagt af láti móður sinnar daginn eftir, þann 6. mars, en póstaði samt sem áður á samfélagsmiðla að hún héldi enn i vonina um að móðir hennar væri á lífi. ,,Ég veit að það er enginn möguleiki þar sem hún hefur ekki haft samband í mánuð. En barn bíður alltaf eftir móðir sinni.” Hún fékk sent myndband af líki móður sinnar síðastliðinn föstudag og kvaðst hún strax hafa þekkt móður sína, óháð handsnyrtingunni.
Fjöldamorð hermanna Putin á óbreyttum borgurum í Bucha hafa valdið hryllingu um allan heim og er líkt við hryllinginn í stríðinu í Kambódíu, Balkansskagastríðinu og seinni heimstyrjöldina. Úkraínsk yfirvöld segja að minnsta kosti 410 lík almennra borgara hafa fundist í Bucha og nálægum bæjum og sé um að ræða skipulagða herferð nauðgana, pyntinga og morða. Mörg líkanna eru með hendur og fætur bundna. Zelensky, forseti Úkraínu, segir Rússa nú reyna að fjarlægja ummerki ógnarverkanna með því að fjarlægja líkin. ,,Þetta er ekkert annað en tilraun til að fela sönnunargögn,” sagði Zelensky í ávarpi til þjóðarinnar.
