Þetta sagði Flemming Splidsboel, sérfræðings hjá DIIS, í samtali við Ekstra Bladet. Hann sagði að nú beini Rússar sjónum sínum í auknum mæli að austurhluta Úkraínu og hinu umdeilda Donbass. Nú sé markmið Pútíns ekki lengur að herja á alla Úkraínu og ekki endilega að sigra í stríðinu. Nú snúist þetta um að halda völdum heima fyrir.
„Þetta er mjög kaldlynd og hugmyndarík stjórn sem er reiðubúin til að ganga mjög langt til að lifa af. Endanlegt markmið Pútíns núna er að stjórn hans lifi af,“ sagði Splidsboel.
Hann sagði að kostnaðurinn á fyrstu vikum stríðsins hafi einfaldlega verið of mikill fyrir Pútín og stjórn hans.
Bandarískar leyniþjónustuupplýsingar benda til að Rússar séu nú að endurskipuleggja her sinn í Úkraínu eftir slæmt gengi fram að þessu. Það sýnir einnig breytta taktík hjá Pútín og hann breytir einnig röksemdafærslu sinni fyrir stríðsrekstrinum að sögn Spidsboel. „Upphaflega var stríðið byggt á hugmyndafræði. Skotmarkið voru nýnasistar og ætlunin var að halda fast í drauminn um gömlu Sovétríkin. En stríðið þarf einnig að vera vinsælt til að stjórnin geti haldið völdum. Vegna þess hvernig stríðið hefur þróast er ný staða komin upp. Pútín og stjórn hans munu gera mikið af því að segja að markmiðin hafi náðst,“ sagði Splidsboel.
Refsiaðgerðir Vesturlanda gegn Rússlandi eru farnar að bíta og Rússar finna vel fyrir þeim. Stríðsreksturinn hefur ekki gengið eins og skyldi og telja sumir að þróun mála síðustu daga sé upphafið á endi „stóra stríðsins“ í Úkraínu. Sumir sérfræðingar telja þó hugsanlegt að Rússar séu bara í smá „pásu“.
Splidsboel sagðist telja að nýtt markmið Pútíns í Úkraínu sé að hertaka Donbass í heild sinni, ekki bara Donetsk og Lugansk. Hann vilji síðan að Krím verði viðurkennt sem rússneskt landsvæði og að Úkraína verði hlutlaust ríki. Það geti þó reynst mjög erfitt fyrir Úkraínu að fallast á þessar kröfur og því geti stríðið haldið áfram um langa hríð.
