Fjársöfnun hefur staðið yfir hjá fjölda hjálparsamtaka síðan innrásin hófst og náði hún eiginlega hápunkti á laugardaginn þegar tvær stærstu sjónvarpsstöðvar landsins, DR og TV2, efndu til tónleika á Ráðhústorginu í Kaupmannahöfn. Þeir voru að sjálfsögðu sýndir í beinni útsendingu á báðum stöðvum en á tónleikana mættu um 30.000 manns að mati lögreglunnar.
Á meðan á tónleikunum stóð gat fólk gefið peninga til styrktar hjálparstarfi í Úkraínu og við úkraínska flóttamenn. Peningarnir skiptast á milli 18 góðgerðasamtaka. Söfnuðust 165 milljónir danskra króna á þeim tveimur klukkustundum sem tónleikarnir stóðu yfir en það svarar til um þriggja milljarða íslenskra króna. Stærsta einstaka framlagið á meðan á tónleikunum stóð var frá Lars Larsen Group, sem á og rekur Jysk (Rúmfatalagerinn), en fyrirtækið gaf 10 milljónir danskra króna en það svarar til tæpra 200 milljóna íslenskra króna. Margrét Þórhildur, drottning, og Friðrik krónprins og Mary eiginkona hans gáfu sameiginlega 1 milljón danskra króna í söfnunina.
En áður en tónleikarnir hófust höfðu 750 milljónir danskra króna, um 15 milljarðar íslenskra króna, safnast. Stærsta einstaka framlagið er frá Lego sem gaf 110 milljónir danskra króna en það svarar til tæplega 2,2 milljarða íslenskra króna. Fyrirtækið Bestseller gaf 100 milljónir.
