The Sun skýrir frá þessu. Fram kemur að Wali hafi farið á eigin vegum til Íraks 2015 til að berjast með Kúrdum gegn hryðjuverkasamtökunum sem kenna sig við Íslamska ríkið.
Hann er fertugur og á eiginkonu og ungan son í Kanada. Hann barðist með kanadíska hernum í Afganistan 2009 og 2011.
Vinur Wali hafði samband við hann í síðustu viku og sagðist hafa þörf fyrir leyniskyttu í leiðangur með hjálpargögn til Úkraínu en ætlunin er að flytja mat til Donbass. Í samtali við La Presse sagði Wali að þetta hafi verið eins og fyrir slökkviliðsmann að heyra brunabjöllu hringja: „Ég varð að fara.“
Sonur hans er ekki orðinn eins árs og sagði Wali skelfilegt að fara frá honum: „Ég veit að þetta er hræðilegt. En þegar ég sé myndir af eyðileggingunni í Úkraínu þá sé ég son minn fyrir mér í hættu og að þjást.“
CBC hefur eftir honum að hann og þrír aðrir fyrrum kanadískir hermenn hafi haldið til Úkraínu og hafi verið vel tekið þegar þeir komum yfir landamærin. „Þeir voru svo ánægðir að fá okkur. Það var eins og við værum strax orðnir vinir.“
„Ég verð að leggja þeim lið hér því þetta er fólk sem sprengjum er látið rigna yfir af því að það vill vera evrópskt en ekki rússneskt,“ sagði hann.
Hann og félagar hans eru nú komnir í samband við úkraínsk yfirvöld en þau hyggjast koma upp herdeildum erlendra sjálfboðaliða.
