Á Costa del Sol halda margir efnaðir Rússar til en nú eru þeir í peningavandræðum. Þeir eiga margir hverjir spænska reikninga en vandinn er að þeir geta ekki millifært peninga frá Rússlandi inn á þá. Því geta þeir ekki greitt fyrir mat og þá reikninga sem til falla. Þeir komast heldur ekki heim því ekkert flug er lengur í boði frá Spáni til Rússlands.
El Pais skýrir frá þessu og hefur þetta eftir fjölda rússneskra ríkisborgar á Costa del Sol og rússneskum samtökum á svæðinu.
Marbella er þekkt fyrir að þar er stórt samfélag Rússa en einn af hverjum fimmtíu íbúum er af rússneskum ættum. Bærinn er þekktur fyrir að vera lúxusferðamannabær með dýrum veitingastöðum og stórri höfn. Hann hefur stundum verið nefndur Marbellagrad vegna þess hversu margir Rússar eru þar. Þar eru rússnesk blöð seld í sjoppum, rússnesk útvarpsstöð er rekin þar og auglýsingar um hús til sölu eru margar hverjar með kyrillísku letri.
Svetlana Ciliuta, formaður samtaka Rússa á Costa del Sol, sagði í samtali við El Pais að fólk væri mjög hrætt um hvaða áhrif það hefur að það hefur ekki aðgang að peningunum sínum lengur. Hún sagði að í Marbella búi margar rússneskar fjölskyldur þar sem konan og börnin séu í bænum en maðurinn í Rússlandi og sendi peninga til fjölskyldunnar. Hún sagði að margar fjölskyldur séu háðar millifærslum frá Rússlandi og óttist að geta ekki greitt fyrir mat eða skólagöngu barnanna.
Rússneska elítan hefur einnig uppgötvað Marbella og nágrenni og hermt er að Pútín eigi sjálfur stórt býli, þar sem vín er framleitt, skammt frá bænum. The Olive Press segir að hann hafi keypt það 2012 og greitt sem nemur um 2,7 milljörðum íslenskra króna fyrir.
