Rússnesk stjórnvöld hafa nú hafið átak í því að fá eigendur samfélagsmiðla til þess að stofna fyrirtæki um rekstur samfélagsmiðlanna í landinu á rússneskri grundu. Sögðu stjórnvöld þar í landi að fyrirtækin hefðu þar til í lok þessa mánaðar til þess að verða við kröfum þeirra.

Rússlandsstjórn samþykkti nýverið löggjöf sem krefst þess að fyrirtækin skrái sig í Rússlandi. Gagnrýnendur laganna segja að með því geti Rússar beitt einstaklinga sem starfa fyrir fyrirtækin og fyrirtækin sjálf beinum hótunum um sektargreiðslur eða handtöku.

Í frétt New York Times um málið kemur fram að Google, Meta, Apple, Twitter, TikTok og fleiri hefðu fengið skilaboð frá rússneskum stjórnvöldum þess efnis. Segir þar jafnframt að Apple, TikTok og Spotify hafi þegar orðið við kröfum stjórnvalda. Twitch og Telegram hafa ekki gert það, og Meta, sem meðal annars rekur Facebook og Twitter hafi orðið við kröfunum að hluta.

Er því nú velt upp af skýrendum vestanhafs að átak rússneskra stjórnvalda setji stjórnendur fyrirtækjanna í þrönga stöðu þar sem þau þurfi að velja milli þess að gefa eftir og fórna þannig tjáningarfrelsi notenda sinna á miðlunum, eða að leggja upp laupanna heilt yfir í Rússlandi og hætta þar starfsemi. Málið flækist þá enn meira þar sem rekstraraðilar samfélagsmiðla í Bandaríkjunum hafa einmitt beitt þeim rökum gegn lagasetningu á samfélagsmiðla þar í landi að slíkt gæti heft tjáningarfrelsi notenda sinna.

Þá hafa stjórnvöld í Bandaríkjunum og í Úkraínu þrýst á fyrirtækin að takmarka starfsemi sína í landinu.

Mark Warner, öldungadeildarþingmaður frá Virginíu, sendi til að mynda Meta, Reddit, Telegram og fleirum bréf þar sem hann bað fyrirtækin um að leyfa Rússum ekki að nýta sér vettvang þeirra til þess að dreifa falsupplýsingum um stríðsherferð sína gegn Úkraínu.

New York Times greindi frá.