Það eru þó ekki bara Íslendingar sem sækja í þennan þjóðarrétt okkar, það virðist vera sem það sé nánast skylda fyrir túrista sem koma hingað til lands að grípa sér að minnsta kosti eina pylsu.
Túristarnir sækja flestir í pylsuvagn Bæjarins beztu í miðbænum og feta þannig í fótspor Bill Clinton fyrrum Bandaríkjaforseta, sem fékk sér einungis sinnep á pylsuna sína og raunveruleikastjörnunnar Kim Kardashian, sem fékk sér ekkert nema tómatssósu á sína.
Þrátt fyrir yfirburði íslensku pylsunnar gagnvart pylsum annarra þjóða þá fellur hún ekki í kramið hjá öllum. Í nokkuð fjölmennum Facebook-hóp sem tileinkaður er útlendingum sem ferðast til Íslands má finna umræðu um íslensku pylsuna.
„Kannski er það bara ég en hvað er svona sérstakt við pylsurnar?“ spyr Chris nokkur, meðlimur hópsins, en hann féll greinilega ekki fyrir íslensku pylsunni. Chris gekk meira að segja svo langt að segja að þær hafi bragðast alveg eins og niðursoðnar pylsur frá Bretlandi. „Þær voru þó samt ódýrasti maturinn sem við keyptum,“ segir hann svo að lokum.
Chris er ekki einn um að finnast íslensku pylsurnar ofmetnar, fleiri meðlimir hópsins taka í svipaða strengi og hann í athugasemdunum við færsluna. „Ég er glöð að ég er ekki sú eina sem skilur ekki hvers vegna fólki finnst þær svona góðar!“ segir Helen nokkur til dæmis.
„Ég varð fyrir miklum vonbrigðum í gær þegar ég fékk mér eina,“ segir svo kona að nafni Line. Line lét sér það ekki duga að segjast hafa orðið fyrir vonbrigðum með íslensku pylsuna – hún bætti því við að danskar pylsur væru betri en þær íslensku. „Mér finnst þær dönsku vera miklu betri!“ segir hún.
Blaðamaður er ekki nógu kunnugur lögum en er þó nokkuð viss um að það flokkist sem landráð.
