Reynir Traustason, ritstjóri og einn eigenda Mannlífs, hefur brugðist við yfirlýsingu sem kom úr ranni Róberts Wessman í kvöld.

Í yfirlýsingu frá talsmanni Róberts kom fram að hann hefur sent Fjölmiðlanefnd bréf þar sem hann æskir þess að nefndin skoði sérstaklega greiðslur til eiganda Mannlífs. Segir hann að útgáfufyrirtækið sem rekur Mannlíf hafi fengið tugmilljóna króna greiðslur fyrir níðskrif Mannlífs um Róbert, en skrifin hafi það að markmiði að skaða orðspor og ímynd Róberts.

Yfirlýsinguna má lesa í fyrri frétt DV um málið í kvöld

Reynir Traustason segir í pistli á vef Mannlífs í kvöld að þessi yfirlýsing frá Róbert vísi til gagna úr innbroti á ritstjórnarskrifstofur Mannlífs. Það atvik var mikið í fréttum í síðustu viku en í innbrotinu var öllum fréttum af vef Mannlífs eytt eftir að innbrotsþjófarnir komust yfir tölvu á ritstjórnarskrifstofunni sem var ekki læst. Tekið skal fram að Róbert Wessmann hefur harðneitað að tengjast innbrotinu með nokkrum hætti. Reynir segir í pistli sínum:

„Róbert Wessman sent frá sér yfirlýsingu og virðist vísa til gagna úr innbroti á ritstjórnarskrifstofur Mannlífs. Hingað til hafa ekki legið fyrir staðfestingar á aðkomu Róberts en nú virðast fingraför auðmannsins smám saman vera að koma í ljós.“

Reynir segir ennfremur:

„Mannlíf hefur undanfarna daga aflað gagna um þá sem talið er að hafi staðið að innbroti hjá Mannlíf og þeir aðilar virðast hafa átt samskipti og samstarf við Róbert um ýmis verkefni. Þessum upplýsingum hefur verið og verður miðlað til lögreglunnar án tafar og varpa vonandi ljósi á ávinning og markmið þess sem raunverulega stóð á bakvið innbrotin. Daginn áður en ný frétt átti að birtast um Róbert á vef Mannlífs hafa þjófarnir látið til skarar skríða. Sú frétt hefur verið endurheimt og birtist fljótlega á vef Mannlífs.“

Segir Reynir enn fremur að Róbert geri núna örvæntingarfulla tilraun til að tengja umfjöllun Mannlífs um hann einhverjum fjárhagslegum hvötum.