DV hefur undir höndum nafnhreinsaða ákæru héraðssaksóknara gegn manni sem sakaður er um nauðgun á heimili sínu í Reykjavík þann 19. september árið 2021. Maðurinn er erlendur ríkisborgari og hefur hann verið úrskurðaður í farbann til 1. mars næstkomandi.
Maðurinn er sagður hafa haft samræði og önnur kynferðismök við konu, án hennar samþykkis, með því að sleikja kynfæri hennar og hafa við hana samræði, þar sem hún lá illa áttuð í sófa á heimili hans, og notfært sér að hún gat ekki spornað við verknaðinum sökum ölvunar.
Fyrir hönd konunnar hefur verið gerð einkaréttarkrafa um miskabætur að fjárhæð 2,5 milljónir króna.
Héraðssaksóknari krefst þess að maðurinn verði dæmdur til refsingar og greiðslu alls sakarkostnaðar.
Málið var þingfest í Héraðsdómi Reykjavíkur þann 12. janúar síðastliðinn. Búast má við því að málinu verði lokið fyrir 1. mars næstkomandi.
