Samtökin Öfgar hafa gagnrýnt að notast sé við hreinsiefni X-Mist á sóttvarnahótelum en aðaleigandi fyrirtækisins er tónlistarmaðurinn Ingólfur Þórarinsson, Ingó Veðurguð, sem hefur dregið sig í hlé frá sviðsljósinu eftir skriðu ásakana um kynferðisbrot. Ingólfur hefur ennfremur stefnt fólki fyrir dóm sem hefur ásakað hann á samfélagsmiðlum.

Hringbraut greinir frá þessu. 

Tanja Ísfjörð, ein talskona Öfga, deildi auglýsingu X Mist á Twitter og sagði:

„Þið eruð að tryggja fjármagn í vasa manns sem nýtir það í að KÆRA konur fyrir að skila skömminni. NENNIÐI AÐEINS.“

Gylfi Þór Þorsteinsson, forstöðumaður sóttvarnahótelanna, svaraði Tönju og tók hann þar fram að X-Mist hefði ekki fengið leyfi fyrir myndbirtingu af sóttvarnahóteli í auglýsingu sinni. Gylfi sagði ennfremur:

„Heil og sæl, mér er ljúft og skylt að svara fyrir þetta. Ég tók þessa ákvörðun eftir að hafa prófað mörg efni til að sótthreinsa viðkvæma fleti en ekki síst til að losna við reykingarlykt úr herbergjum.Við höfum átt í vandræðum með þau herbergi þar sem reykt hefur verið og eftir að hafa prófað margt, ákvað ég að halda áfram á prófa þetta efni. Sú prófun byrjaði í síðustu viku og mun halda áfram næstu dagana. Að því loknu verður tekin ákvörðun um kaup eða ekki.“