Vegna fjarveru starfsfólks, sem hefur þurft að vera í sóttkví og einangrun vegna COVID-19, hafa fyrirtæki í byggingariðnaði og matvælaframleiðslu þurft að glíma við mikla fjarveru starfsfólks, sérstaklega síðustu vikur.

Morgunblaðið skýrir frá þessu í dag. Haft er eftir stjórnendum að þetta hafi þó sloppið til í flestum tilvikum og ekki hafi þurft að stöðva vinnu við byggingar eða framleiðslu í fyrirtækjum en stundum hafi þetta staðið mjög tæpt.

Vegna hraðrar útbreiðslu Ómíkronafbrigðisins hefur þeim fjölgað mjög að undanförnu sem þurfa að vera í einangrun og sóttkví. Nú eru rúmlega 20.000 manns í þeirri stöðu. „Við höfum satt best að segja verið mjög heppin fram til þessa en nú kvarnast úr hópnum dag frá degi. Staðan er afleit og þetta er farið að hafa töluverð áhrif á okkar starfsemi,“ er haft eftir Þorvaldi Gissurarsyni, forstjóra ÞG verks. Hann sagði að finna verði viðunandi lausn því það hafi mikil áhrif á samfélagið að svo margir séu í sóttkví og einangrun.

Gunnar Sigurðsson, viðskiptastjóri á viðskipta- og hugbúnaðarsviði Samtaka iðnaðarins, sagði mörg fyrirtæki hafi verið í miklum vandræðum en hafi náð að bjarga sér.