Diljá Mist Einarsdóttir, þingmaður Sjálfstæðisflokksins, gerir bólusetningar barna að umtalsefni í aðsendri grein í Fréttablaðinu í dag en tilkynnt hefur verið að bólusetning 5-11 ára barna gegn Covid-19 hefjist í næstu viku.
„Þótt einungis fáir dagar séu þar til verkefnið eigi að hefjast er margt á huldu varðandi framkvæmdina. Þannig komst vinnuhópur um framkvæmdina að þeirri niðurstöðu að vænlegast væri að hafa bólusetningarnar í skólunum. Heilsugæslan hefur þó óskað eftir því að skólastarf verði fellt niður á bólusetningardögum. Ekki var haft samráð við skólasamfélagið í áætlanagerð Heilsugæslunnar og nú hafa bæði umboðsmaður barna og skjólastjórnendur lýst yfir andstöðu við hugmyndir um bólusetningu í skólum,“ segir Diljá.
Þá bendir hún á að rök þeirra sem best þekkja til hagsmuna og þarfa barna séu af ýmsum toga. „Meðal annars er horft til þess að nú þegar hefur borið á félagslegum vandræðum í hópi eldri barna vegna umræðna um bólusetningu í þeirra hópi. Bólusetning í grunnskólum mun aldrei geta tryggt persónuvernd og friðhelgi einkalífs ungra barna. Það er umhugsunarvert að þeir sem bera ábyrgð á ákvörðun um bólusetningu og skipulagi hennar hafi ekki lagt áherslu á að leita betra samráðs við þá sem hafa bestu innsýn í aðstæður barna,“ segir hún.
Á opnum fundi í velferðarnefnd Alþingis um bólusetningu 5 til 11 ára barna gegn Covid-19 sátu fulltrúi landlæknis og Heilsugæslunnar fyrir svörum nefndarmanna. Diljá segir að samkvæmt orðum fulltrúa landlæknis höfðu verið gerðar rannsóknir á um 2.600 börnum áður en skilyrt markaðsleyfi var gefið út af Lyfjastofnun Evrópu. „Þetta er ekki ýkja mikill fjöldi, né heldur getur talist vera liðinn langur tími til að meta að fullu hvernig mat á áhættu og ávinningi lítur út vegna bólusetningar barna á þessum aldri,“ segir hún.
