Fréttablaðið skýrir frá þessu í dag. Blaðið ræddi við þrjár konur sem bíða eftir niðurstöðum leghálsskimana. Tvær hafa beðið síðan í mars og ein, sem barðist við krabbamein árið 2005, fullyrðir að hún hefði líklega ekki lifað af ef hún hefði greinst í dag.
Ein kvennanna, Álfrún Auður Bjarnadóttir, sagði í samtali við Fréttablaðið að hún beri lítið sem ekkert traust til heilbrigðisyfirvalda en hún hefur beðið eftir svörum í tæplega hálft ár eftir svörum í kjölfar frumubreytinga í leghálsi. Hún fór í skoðun 30. mars og 16. júlí fékk hún skilaboð um frumubreytingarnar. Henni var um leið tilkynnt að hún ætti von á símtali á næstu dögum um hvenær hún fengi tíma í leghálsspeglun. Eftir það hefur hún ekkert heyrt þrátt fyrir ítrekaðar tilraunir. Fyrir nokkru fékk hún svör um að beiðni hennar um speglun hefði ekki borist þar sem allir viðeigandi væru í sumarfríi. „Er svo undirmannað að enginn getur leyst þetta fólk af og er bara ein manneskja að sjá um að senda allar beiðnirnar? Hvaða rugl er þetta,“ er haft eftir Álfrúnu sem segist eðlilega hafa miklar áhyggjur af þessu og þetta taki á andlega.
Sumarið 2003 var Bryndís Dagbjartsdóttir einkennalaus en vorið 2004 greindust frumubreytingar hjá henni. Hún greindist síðan með krabbamein veturinn 2005. „Ég fullyrði það að ef ég væri að lenda í þessu í dag myndi ég líklega ekki lifa það af,“ hefur Fréttablaðið eftir henni.
Eygló Guðmundsdóttir, lektor í heilbrigðisvísindum, tók málin í eigin hendur eftir að hún fékk niðurstöður úr leghálssýnatöku. Eftir óljós svör og eftir að hafa orðið vitni að því sem hún lýsir sem óeðlilegu verklagi greip hún til þess að setja sig í samband við alla þá sem höfðu eitthvað með sýnin hennar að gera. Segir Fréttablaðið að miðað við lýsingar hennar sé staðan óhugnanleg. Hún nefndi sem dæmi að hún hefur ekki fengið nein svör um hvar sýni hennar var staðsett í tólf vikur frá því að það var tekið og sent til greiningar. „Þetta er algjörlega með öllu óásættanlegt,“ sagði hún.
