Héraðsdómur Reykjavíkur dæmdi í vikunni mann í tveggja ára fangelsi brot í nánu sambandi, hótanir, líkamsárás og fíkniefnalagabrot. Maðurinn braut ítrekað gegn nálgunarbanni með því að setja sig í samband við fyrrverandi kærustur. Maðurinn var jafnframt ákærður fyrir rán, en var sýknaður af þeim hluta ákærunnar.
Hótanir mannsins beindust að sömu fyrrverandi kærustu, vinkonu hennar, systur sinni og fleirum. Óhætt er að segja að hótanirnar eru einkar ófyrirleitnar og grófar. Eru þær tilgreindar í ákærunni, sem er svo í á fjórða tug liða.
Brot mannsins er varða hótanir og brot á nálgunarbanni eru einkar ógeðfelldar. Hótar maðurinn kærust sinni, vinkonu hennar, systur sinni með tölvupóstum, skilaboðum í síma og símtölum. Á einum stað er maðurinn sagður hafa sent konunni yfir eitt þúsund skilaboð á aðeins rétt rúmlega tveggja vikna tímabili.
Þá er maðurinn sakfelldur fyrir að hafa ítrekað ekið bifreið án réttinda, víðs vegar um landið og stundum undir áhrifum fíkniefna. Í febrúar 2019 er maðurinn jafnframt sagður hafa ráðist að einstaklingi í Hafnarfirði með hníf. Þegar brotaþoli flúði út á svalir mun maðurinn hafa sveiflað hnífi sínum í rúðu á svalahurðinni með þeim afleiðingum að hún brotnaði og haldið því næst árás sinni áfram.
Maðurinn á við geðræn vandamál að stríða, að því er segir í dómnum. Við ákvörðun refsingar var litið sérstaklega til góðrar hegðunar mannsins fyrir dómi við meðferð málsins og þess að hann játaði að hluta til sök í málinu.
Til frádráttar refsingar, segir í dómnum, kom gæsluvarðhald sem maðurinn sat í óslitið frá 1. október til 29. apríl.
