Mikil skjálftavirkni hefur verið á Reykjanesskaganum frá því í gærkvöld og fram eftir nóttu. Samkvæmt tilkynningu frá Veðurstofunni jókst hófst órói skömmu eftir miðnætti og stóð í um 20 mínútur.

Stærsti skjálftinn í nótt mældist 5,0 og var það kl. 2:02. Í kjölfarið mældust fjórir skjálftar yfir 4 að stærð og margir skjálftar yfir 3.

„Almannavarnadeild Ríkislögreglustjóra og Veðurstofa Íslands funduðu ásamt Lögreglunni á Suðurnesjum og fulltrúa Grindavíkurbæjar kl. 03.30 í nótt vegna fjölda jarðskjálfta af stærðinni 3-5 á svæðinu frá Þorbirni að Fagradalsfjalli. Jarðskjálftarnir finnast vel í Grindavík og fólk er skiljanlega órólegt. Líklegast er að skjálftarnir sem finnast núna í Grindavík séu afleiðingar spennubreytinga í jarðskorpunni, en ekki vegna tilfærslu á kviku. Það er því ekki metið sem svo að þeir séu skammtímafyrirboði eldgoss. Áfram má búast við jarðskjálftum í nótt sem finnast vel í Grindavík. Náttúruvásérfræðingar Veðurstofunnar og Almannavarnadeild fylgjast vel með þróun mála í nótt. Vegagerðin og Lögreglan á Suðurnesjum eru á ferð og kanna hvort skemmdir hafi orðið á vegum. Staðan verður endurmetin í fyrramálið.“

Heldur hefur hægst um frá því kl.4 í nótt og hefur skjálftum fækkað mikið (RÚV).

Meðfylgjandi mynd af Fagradalsfjalli tók Snorri Þór Tryggvason. Sjá má 360 gráðu mynd af fjallinu hér.