51 árs karlmaður var færður fyrir dómara í Árósum klukkan 09.30 að dönskum tíma þar sem lögreglan krafðist gæsluvarðhalds yfir honum vegna morðsins á Freyju Egilsdóttur Mogensen. Hann játaði að hafa myrt Freyju.

Samkvæmt frétt Ekstra Bladet þá játaði hann hafa kyrkt Freyju og að hafa sagað líkið í hluta og grafið suma í garðinum en falið aðra innanhúss. Þegar þetta var komið fram fyrir dómi lokaði dómarinn réttarhöldunum og vísaði fréttamönnum út til að nánari upplýsingar um málsatvik myndu ekki koma fyrir almenningssjónir. Það er gert vegna rannsóknarhagsmuna.

Það var maðurinn, sem er fyrrum sambýlismaður Freyju, sem tilkynnti um hvarf hennar í gærmorgun. Síðast sást til hennar þegar hún yfirgaf vinnustað sinn í Odder á tólfta tímanum á fimmtudagskvöldið. Á laugardag barst vinnuveitanda hennar sms úr síma hennar þar sem hún tilkynnti veikindi. Lögreglan telur að þá hafi hún verið látin.

Enn á eftir að staðfesta með rannsókn réttarmeinafræðings að líkið sé af Freyju en lögreglan er fullviss um að svo sé. Grunur lögreglunnar beindist fljótt að manninum og var hann handtekinn í gærmorgun, skömmu eftir að hann tilkynnti um hvarf Freyju.

Freyja fannst látin – Maður handtekinn vegna gruns um morð

Vinir og ættingjar Freyju í áfalli yfir hvarfi hennar

Danska lögreglan leitar að Freyju Egilsdóttur – Hvarf eftir vinnu á fimmtudaginn