Páll Vilhjálmsson, kennari, fréttamaður og bloggari, fjallar um skólamál í nýlegri færslu á bloggsíðu sinni. Þar segir hann að grunnskólinn sé kvennaskóli ef mið er tekið af kennarastéttinni. Hann segir að um níutíu prósent kennara séu konur.

„Drengjum er kennt, bæði beint og óbeint, að menntun sé fyrir stúlkur. Kvenlægar kennsluaðgerðir, s.s. ,,yndislestur“ eru ráðandi eins og við er að búast í kvennaskóla,” segir Páll í færslu sinni.

Hann segir síðan að útkoman sé fyrirsjáanleg. Karlar séu einungis þriðjungur þeirra sem útskrifast úr háskóla. Munurinn sé enn meiri þegar framhaldsnám á í hlut, þar séu karlar í miklum minnihluta þeirra sem útskrifast með meistara- og doktorspróf.

Hann segir gjaldfall menntunar blasa við, háskólastéttirnar séu að kvenvæðast og að þær lækki hlutfallslega í launum miðað við aðrar starfsstéttir. Hann víkur síðan að gæðum háskólanáms í lokaorðum sínum: „Háskólanám almennt lætur á sjá, samanber hjávísindin um manngert veður og kynjafræði sem segja Darwin ómarktækan og halda fram bábiljum um að kynin séu félagslega skilgreind en ekki líffræðilega.“