Jón Jósafat Björnsson, framkvæmdastjóri Dale Carnagie á Íslandi, birti pistil á Vísi í dag þar sem hann segir Ísland þurfa frekar fáa ferðamenn sem eyða miklum pening frekar en marga ferðamenn sem eyða litlu sem engu. Hann segist líka vera með lausnina hvernig við getum fengið ferðamenn til að eyða pening hér.

„Fyrir nokkrum dögum var ég staddur í bakaríi ásamt 11 öðrum þegar viðskiptavinur númer 13 gerði sig líklegan til að koma inn. Um leið og hann opnar hurðina hrópar starfsmaður bakarísins “út, út… þú verður að fara út… það eru of margir hér inni,““ skrifar Jón en hann áttaði sig á því að fyrir starfsfólkið skiptu sóttvarnir meira máli en upplifun viðskiptavinarins.

Undanfarna mánuði hefur fólk í framlínu fengið þetta hlutverk, að passa upp á sóttvarnarreglur. Sóttvarnarreglur sem eru óljósar og breytast reglulega.

„Þegar ég beið eftir að röðin kæmi að mér, velti ég fyrir mér hvernig stjórnendur viðkomandi fyrirtækisins hafi þjálfað starfsfólkið sitt í þessu nýja hlutverki. Hafði það yfirleitt fengið einhverja þjálfun?“ segir hann en þá fer hugurinn til ferðamanna sem búast mögulega við betri þjónustu en við Íslendingar.

„Víða heyrist að við ættum að horfa meira á gæði ferðamanna en magn þ.e.a.s. að laða til okkar ferðmenn sem skilja meiri peninga eftir. Í þeirri umræðu ættum við að hafa hugfast að ferðamenn sem eyða miklu gera líka miklar kröfur um gæði og góða þjónustu,“ segir Jón og bætir við að ef Ísland vill vera hágæða vara í augum ferðamanna þarf hver og einn að standa klár á sínu hlutverki.