Þórólfur Guðnason, sóttvarnalæknir, og Víðir Reynisson, yfirlögregluþjónn, sátu upplýsingafund Almannavarnardeildar ríkislögreglustjóra og Embætti landlæknis vegna Covid-19 í dag.
Enginn greindist innanlands í gær af 207 sýnum. Á seinustu vikum hafa tveir greinst innanlands en báðir voru í sóttkví. Einn liggur inn á Landspítala með virkt smit en enginn á gjörgæslu.
Samkvæmt Þórólfi hafa nýjar aðgerðir á landamærum gengið vel en mikill meirihluti þeirra sem kom til landsins um helgina var með neikvætt PCR-próf með sér. Hann segir hafa lagt inn tillögur um tilslakanir og að þær komi líklegast í gildi í vikunni.
Bólusetningar hafa gengið vel en í þessari viku er stefnt á að bólusetja 6.000 manns. 80-89 ára eiga von á bólusetningu í vikunni.
Tilslakanirnar sem Þórólfur lagði til innihéldu ekki slökun á grímunotkun. Hann segir fólk taka almennt vel í grímuna en hann viti ekki hvenær hann vilji að gríman falli endanlega. Hluti af tillögunum eru leiðbeiningar um íþróttaleiki. Ekki var farið nánar út í þær.
