Skömmu eftir miðnætti var lögreglunni tilkynnt um konu sem væri á gangi á miðri akbrautinni á Sæbraut og hoppaði í veg fyrir umferð. Konan vildi ekki fara að fyrirmælum lögreglunnar og var því handtekin og flutt á lögreglustöð. Hún reyndist vera ölvuð. Að loknum viðræðum fékk hún að fara heim og sagðist ætla að fara að sofa.

Á áttunda tímanum í gærkvöldi var maður handtekinn í Hlíðahverfi en hann er grunaður um vörslu/sölu fíkniefna og brot á vopna- og lyfjalögum. Hann var vistaður í fangageymslu.

Á sjötta tímanum í gær var tilkynnt um hnupl úr verslun í miðborginni. Lögreglan hafði afskipti af manni sem er grunaður um að hafa stolið kjöti úr versluninni.

Á fjórða tímanum var tilkynnt um tilraun til innbrots í skartgripaverslun í Kópavogi. Tveir menn brutu rúðu í versluninni en náðu ekki að komast inn og urðu því að hverfa frá tómhentir. Á fimmta tímanum í nótt var tilkynnt um innbrot í fataverslun í Bústaðahverfi, frekari upplýsingar liggja ekki fyrir.

Í Garðabæ voru rúður brotnar í strætóskýli í nótt.

Tveir ökumenn voru handteknir í gærkvöldi, grunaðir um að vera undir áhrifum áfengis og/eða fíkniefna. Einn var kærður fyrir að aka sviptur ökuréttindum.