Slökkviliðið í Vestmannaeyjum var ræst út rétt fyrir klukkan ellefu í gærkvöldi þegar tilkynnt var um eld í bíl á athafnasvæði sorpeyðingastöðvar sveitarfélagsins. Tilkynnt hafði verið um eld í bíl á athafnasvæði stöðvarinnar og þegar slökkviliðið bar að garði reyndist mikill eldur vera laus í þremur bílhræjum sem biðu förgunar. Öllu verra var að eldtungurnar höfðu læst sig í sorphirðubíl Kubbs ehf. sem einnig stóð í ljósum logum.

„Það bendir ýmislegt til þess að eldurinn hafi kviknað í bílhræi og hafi svo borist yfir í sorphirðubílinn. Þetta er mikið og óheppilegt tjón fyrir þá Kubbsmenn,“ segir Friðrik Páll Arnfinnsson, slökkviliðsstjóri í Vestmannaeyjum.

Að hans sögn gekk greiðlega að ráða niðurlögum eldsins en bílhræin voru fjarlægð eitt af öðru með aðstoð starfsmanna og tækja frá Kubbi ehf. Þá var farið vandlega yfir vettvanginn með hitamyndavél og gengið úr skugga um að hvergi leyndust glæður eða hiti á svæðinu.
Friðrik Páll segir að þetta sé ekki í fyrsta sinn sem eldur kemur upp á athafnasvæði sorpeyðingarstöðvarinnar.

„Við höfum nokkra reynslu af því að fara þangað upp eftir og slökkva eld, núna síðast í vor minnir, þannig að það má segja að þetta sé hættusvæði.“

Lítið tjón hafi þó orðið í þeim tilvikum ólíkt atburðinum í gærkvöldi þar sem sorphirðubíllinn er að öllum líkindum ónýtur. Ljóst er að eldur kviknar ekki að sjálfu sér í yfirgefnum bílhræjum en Friðrik Páll sagði ekki tímabært að tjá sig neitt um það. „Lögreglan er komin með málið í rannsókn og mun eflaust senda út tilkynningu þegar það er tímabært.“

Færsla Slökkviliðsins í Vestmannaeyjum