Tveir hundar urðu ketti að bana við Ásveg í 104 Reykjavík í dag. Íbúi á svæðinu greinir frá þessu í Facebook-hópnum Langholtshverfi – 104 og biður um leið hundaeigendur að hafa hundana sína í bandi. „Kötturinn er svartur og búið er að fara með hann á dýraspítala. Eftirköstin eru vægast sagt hryllileg í garðinum hjá okkur,“ segir konan í færslunni.
DV hafði samband við aðra konu sem býr á svæðinu sem kom að hundunum þegar þeir voru að leika sér að lífi kattarins í garðinum. Konan varð var við að eitthvað var að þegar hún heyrði köttinn mjálma af angist. Hún ákvað að kanna málið nánar og sá þá annan hundinn með köttinn í gininu. Hún gerði hvað hún gat til að reyna að hræða hundana í burtu og tókst henni að lokum en þá var kötturinn nú þegar dauður. „Þeir voru bara búnir að tæta hann í sig,“ segir hún um málið í samtali við blaðamann.
Konan tók köttinn og dreif sig upp á dýraspítalann í Víðidal með hann svo hægt væri að skanna örmerkinguna á honum og hafa samband við eiganda hans. Hún segir köttinn hafa verið illa farinn eftir hundana og óttast hvað hefði gerst ef þeir hefðu verið lausir mikið lengur. Sem betur fer náði Dýraþjónusta Reykjavíkur að fanga hundana og er nú verið að leita að eiganda þeirra.
Atvikið hefur ekki farið vel ofan í íbúa í hverfinu ef marka má athugasemdirnar við færsluna í Facebook-hópnum. Einn íbúi í hverfinu segir til dæmis að búið hafi verið að tilkynna þessa hunda og að þeir hafi næstum því orðið öðrum ketti að bana áður. „Það er margbúið að tilkynna þessa hunda en ekkert er gert. Hvers konar verkferlar eru í gangi. Þeir voru einu sinni mjög nálægt því að tæta köttinn okkar í sig en náðum að bjarga honum á síðustu stundu. Þetta var bara tímaspursmál hvenær þetta myndi gerast. Samúðarkveðjur á eiganda kattarins,“ segir íbúinn.
„Guð minn góður ég myndi tryllast! Hver á þessa hunda?“ segir svo annar íbúi í hverfinu í athugasemd við færsluna og fleiri taka í svipaða strengi.
