Til átaka kom í Hagkaupum Spönginni í gærkvöld upp úr klukkan 19. Að sögn sjónvarvotts var hópur ungmenna, líklega á aldrinum 18 til 20 ára, með dólgslæti inni í versluninni. Einn mannanna hafði sig mest í frammi, sem og kærasta hans, sem öskraði og lét öllum illum látum.
„Ég á erfitt með að sjá aldur á fólki, ég myndi samt skjóta á að þetta hafi verið fólk á aldrinum 18 til 20 ára. Það var einn sem hafði sig mest í frammi, var alveg brjálaður,“ segir maðurinn í samtali við DV.
Sjónarvottur segir að atburðarásin hafi verið nokkuð ruglingsleg en hann varð engu að síður vitni að því að þrír menn náðu að snúa niður árásarmanninn og yfirbuga hann. Sjónarvotturinn sá jafnframt að afgreiðslustúlka á staðnum var alblóðug eftir árás mannsins.
Sjónarvotturinn sá einnig lögreglubíl og sjúkrabíl á vettvangi skömmu áður en hann yfirgaf svæðið.
DV hafði samband við Elínu Agnesi Kristínardóttur, aðstoðaryfirlögregluþjón á Lögreglustöð 4. „Málið er í rannsókn, við erum að safna gögnum og meira get ég ekki sagt í bili,“ sagði Agnes og vildi ekki gefa upplýsingar um hve margir hefðu verið handteknir vegna málsins né um áverka á fólki.
