Afar sérkennileg uppákoma varð á Facebook-síðu Gistiheimilisins Bjarmalands í gærkvöld. Gistiheimilið er með einstaklingssíðu á Facebook en ekki dæmigerða fyrirtækja- eða „like“ síðu. Gistiheimilið á 4.900 Facebook-vini.
Gistiheimilið Bjarmaland er opið allt árið, það er staðsett við Sveinseyri rétt hjá Tálknafirði og hefur notið vinsælda m.a. fyrir mikla náttúrufegurð á svæðinu. Færslur á FB-síðu gistiheimilisins hafa einnig einmitt einkennst af því og birtast þar oft fallegar ljósmyndir af náttúrfegurð í héraðinu. Svohljóðandi færsla sem birtist laust eftir hálfellefu í gærkvöld stingur hins vegar mjög í stúf:
„Ég er ekki á móti bólusetningum! Bjó í Chile í mörg ár. Ég fékk bólusetningar sem Íslendingar fá ekki. Ég samþykki EKKi covid 19 Spike prótín tilraunasprautuna. Og mun gefa mig fram að fara í sleik við sýkta manneskju af Covid-19 og sýna ykkur hvað mun gerast. Á MÍNU HEIMILI HEFUR ENGINN FENGIÐ HÓAX SPRAUITUNA! Enginn fengið Covid 19 og við þekkjum engan sem hefur veikst af covi 10. HOAX Punktur“
Í ummælum undir færslunni furðulegu bætir gistiheimilið um betur og segir: „Smit hingað takk.“
Miklar umræður urðu undir færslunni og gerðu sumir því skóna að síðan hefði verið hökkuð því þetta væri fullkomlega ólíkt aðstandendum gistiheimilisins. Einn þátttakandi í umræðunum segist hafa hætt við að bóka gistingu á staðnum eftir lesturinn. Einn spyr hvernig hægt sé að fara í sleik við gistiheimili.
Færslan hefur verið tekin niður. Einn þátttakandi í umræðunum birti fyrirspurn á FB-vegg gistiheimilisins þess efnis hvort ekki stæði til að birta afsökunarbeiðni. Þeirri fyrirspurn var eytt.
Forsvarsmaður Gistiheimilisins Bjarmalands er Gísli Matthíasson og náði DV sambandi við hann. Aðspurður sagði hann að þetta hefði verið skrifað í „bríarí og fyllerí“ og hefði enga merkingu. Hann sagði að ekki stæði til að birta yfirlýsingu vegna málsins, málinu væri einfaldlega lokið, enda hafi færslunni verið eytt.
