Á tíunda tímanum í gærkvöldi var tilkynnt um innbrot í íbúðarhús í Hlíðahverfi. Þar hafði gluggi verið losaður úr og farið inn. Ekki liggur fyrir hverju var stolið. Um hálfri klukkustund síðar var tilkynnt um innbrot í íbúðarhús í Háaleitis- og Bústaðahverfi. Þar var stormjárn skemmt og síðan farið inn um glugga. Búið var að róta til en öryggiskerfi fór í gang og fældi innbrotsþjófana á brott. Fyrir utan skildu þeir eftir muni sem tengjast öðrum innbrotum.

Á svæði Háskóla Íslands var tilkynnt um innbrot í bifreið um klukkan 21. Rótað var í henni og munum stolið. Einnig var búið að skemma kveikjulásinn og því hafði líklega átt að stela bifreiðinni.

Í miðborginni var dyravörður kýldur í andlitið á ellefta tímanum. Vitað er hver gerandinn er.

Á fyrsta tímanum í nótt datt ungur maður af rafmagnshlaupahjóli í miðborginni. Hann var fluttur á slysadeild með sjúkrabifreið.

Tveir ökumenn voru handteknir í nótt grunaður um að vera undir áhrifum fíkniefna.