Þórólfur Guðnason sóttvarnalæknir segir að allt bendi til þess að hægt sé að ná hjarðónæmi með því að þorri þjóðarinnar verði sprautaður í þriðja sinn með bóluefni gegn Covid-19. Þetta kom fram í Kastljósi í kvöld.

Af þeim sem hafa fengið örvunarskammt hérlendis, þ.e. þriðju sprautu, hafa aðeins tíu smitast, af 30 þúsund manna hópi. Af þeim milli 270 og 280 þúsund sem hafa fengið tvær sprautur hafa 4.500 smitast.

Hjarðónæmi er skilyrði fyrir því að hér sé hægt að leggja af sóttvarnatakmarkanir til langframa. Til að hjarðónæmi náist þarf annaðhvort meirihluti þjóðarinnar að smitast eða ónæmi að nást með bóluefnum, en það síðarnefnda hefur ekki tekist til þessa. Er tvöföld bólusetning talin veita um 50% vörn gegn Covid-smiti.

Þórólfur sagði:

„Mér finnst allt benda til þess að við getum bundið vonir við það að skammtur númer þrjú muni búa til hjarðónæmi hérna og stoppa þetta allavega verulega af. 

Við erum að gera þetta eins hratt og við getum. Við erum búin að raða fólki upp í hópa eftir því hvenær það getur fengið örvunarskammtinn eftir fimm mánuði. Það er í lok þessa árs og í byrjun þess næsta sem það ætti að takast. Við bindum vonir við að fólk muni mæta vegna þess að örvunarbólusetningin verndar ekki bara einstaklinginn sjálfan fyrir smiti og alvarlegum veikindum heldur líka fyrir samfélagslegu smiti. Þannig ættum við að geta komist út úr Covid ef allt virkar eins og það kannski virðist núna.“