Líkt og DV greindi frá í október setti Lífeyrissjóður verslunarmanna 138 fyrirtæki á útilokunarlista vegna stefnu sjóðsins um að fjárfesta ekki í fyrirtækjum sem uppfylla ekki skilyrði um sjálfbærni og ábyrgar fjárfestingar. Inni á heimasíðu Lífeyrissjóðs verslunarmanna segir að þeir sem útilokaðir séu úr eignasöfnum LV eru framleiðendur tóbaks, framleiðendur umdeildra vopna, tilteknir flokkar jarðefnaeldsneytis og fyrirtæki sem brjóta gegn vissum alþjóðasamningum.

Lífeyrissjóður verslunarmanna er sá stærsti hér á landi.

Þrátt fyrir ákvæði um að fjárfesta ekki í tóbaksfyrirtækjum, fjárfesti lífeyrissjóðurinn í ríkisskuldabréfum fyrir 17 milljarða í fyrra og eiga nú samtals 169 milljarða inni hjá ríkinu. Nemur raunar fjárfesting lífeyrissjóðsins í ríkisskuldabréfum 43% af heildar fjárfestingum sjóðsins í innlendum skuldabréfum.

Eins og alþjóð veit er íslenska ríkið stærsti, og eini, heildsali tóbaks á Íslandi.

Aðspurður hvernig fjárfestingar Lífeyrissjóðs verslunarmanna í ríkisskuldabréfum rúmast inni í fjárfestingarstefnu sjóðsins í ljósi áðurnefndrar útilokunarstefnu, segir Þórhallur B. Jósepsson að útilokun fjárfestinga nær aðeins til hluta- eða skuldabréfa í fyrirtækjum sem framleiða tóbak.

Þá segir hann að útilokunin nái ekki til ríkja. „Á síðari stigum kann að verða breyting hvað þetta varðar, en ekki er tímabært að svo komu að taka afstöðu til þess,“ bætir hann við.

Á meðal fyrirtækjanna þrettán sem útilokuð hafa verið af sjóðnum vegna tóbaksframleiðslu eru Philip Morris International, Japan Tobacco Inc. og British American Tobacco P.L.C. Fyrirtækin framleiða meðal annars Marlboro, Lucky Strike og Winston.

Áfengis og tóbaksverslun ríkisins er heildsali hér á landi fyrir allar þær tegundir, og fleiri.