Vestfirðir trónir nú á toppi nýjasta lista Lonely Planet yfir áfangastaði árið 2022. Hljóta firðirnir hina svokölluðu „Best in Travel“ viðurkenningu að þessu sinni.

Vestfirski fréttamiðillinn BB.is var að sjálfsögðu fyrstur með fréttina.

Fyrir Íslendinga ætti aðdráttarafl ægifagrar náttúru fyrir vestan ekki að koma á óvart, en þó virðist landshlutinn hafa átt í erfiðleikum með að fanga athygli ferðamanna hingað til en aðeins lítið brot ferðamanna á síðustu árum hafa lagt leið sína þangað. Yfirgnæfandi meirihluti ferðamanna ferðast um Suðurlandið, eða hátt í 95%.

Í umsögn með verðlaununum segir að Vestfirðir sé einn af síðustu áfangastöðum Evrópu þar sem hægt sé að upplifa ósnortna náttúru með auðveldum hætti. Í samtali við BB.is segir Sigríður Dögg Guðmundsdóttir viðurkenninguna frábæra fyrir þróunarstarf sem átt hefur sér stað í ferðaþjónustu á Vestfjörðum. „Það má líka segja að þetta komi á besta tíma, nú þegar við stöndum frammi fyrir því verkefni að vekja áhuga ferðamanna á Íslandi á ný í kjölfar Covid-19 þar sem við munum eiga í harðri samkeppni við önnur lönd,“ hefur BB.is eftir Sigríði.

Nánar má lesa um málið á vef BB.is.