Aðstandendur konunnar sem lést á Heilbrigðisstofnun Suðurnesja haustið 2019 fá ekki notið aðstoðar skipaðs réttargæslumanns. Héraðsdómur úrskurðaði að svo skyldi vera 13. október síðastliðinn og staðfesti Landsréttur þann úrskurð nú í vikunni.

Aðstandendur kærðu lækna á Heilbrigðisstofnun Suðurnesja í upphafi þessa árs fyrir að hafa valdið dauða konunnar með framkvæmd lífslokameðferðar.

Í beiðni aðstandendanna til héraðsdóms færa þau rök fyrir því að þau séu brotaþolar samkvæmt skilgreiningu sakamálalaga. Vísa þau í greinargerð sinni, sem DV hefur undir höndum, meðal annars til kæru sinnar, rannsókn Embættis landlæknis sem leiddi til leyfissviptingar læknisins í málinu og Mannréttindasáttmála Evrópu þar sem staða brotaþola er veitt þegar andlát verður vegna saknæmra mistaka eða vanrækslu sem hið opinbera ber ábyrgð á.

Í úrskurðinum umrædda segir að þó dómurinn geti „í mörgu“ tekið undir það sem fram kemur í beiðni aðstandendanna geti úrlausn dómsins ekki byggt á öðru en lögum. Vísaði dómurinn til fordæma úr Hæstarétti og lögskýringagagna og komst að þeirri niðurstöðu að brotaþoli, í skilningi þeirra laga, geti ekki verið annar en sá sem brot beinlínis beinist að. Þeirra á meðal séu ekki nánustu aðstandendur brotaþola.

Í samtali við DV segir Eva Hauksdóttir, dóttir konunnar sem lést á Heilbrigðisstofnuninni, að þau muni ekki una úrskurðinum og undirbúi nú kæru til Mannréttindadómstóls Evrópu.

Eva segir að málið snúist ekki um að fá greiddan lögmann frá ríkinu, heldur fylgir formlegri stöðu brotaþola ítarlegri aðgangur að upplýsingum, til dæmis um framgang rannsóknar á kæru fjölskyldunnar.