Bræðurnir Einar og Ágúst Arnar Ágústssynir hafa opnað veitingastaðinn Slæs í Garðabænum, nánar tiltekið við Iðnbúð 2. Inni á heimasíðu veitingastaðarins nýja er hvergi vikið að eignarhaldi eða ábyrgðarmönnum félagsins og þeir hvergi nefndir á nafn. Heimildir DV herma þó að staðurinn sé að fullu í eigu bræðranna. Þá segir í frétt Fréttablaðsins um málið að Megn ehf. sé skráð fyrir léninu slaes.is, en DV sagði frá því í júní að bræðurnir væru aftur farnir á kreik og þá með félagið Megn ehf.
Fréttir af bræðrunum hafa vakið mikla athygli í dag. Meðlimur Facebook-hópsins Markaðsnördar tók eftir því að bræðurnir eru af öllum líkindum sekir um að hafa stolið merkinu fyrir nýja pizzustaðinn sinn. Meðlimurinn vekur athygli á því að merkið sem Slæs notað er stolið af öðrum pizzustað.
„Kemur kannski ekki á óvart miðað við hverjir eiga í hlut en þetta er frekar óforskömmuð markaðssetning,“ segir sá sem vekur athygli á þessu í hópnum. „Vá þetta er svo í stíl við þessa svikahrappa,“ segir einn meðlimur hópsins svo í athugasemdunum við færsluna.
Dómur fyrir fjársvik
Bræðurnir Einar og Ágúst hafa verið kallaðir „Kickstarter-bræðurnir“ og eru einna þekktastir fyrir aðkomu sinni að yfirtöku á félagi Zuista á Íslandi og viðamiklu fjársvikamáli á síðunni Kickstarter.
Einar, eldri bróðirinn, hlaut í héraðsdómi árið 2017 þriggja ára og níu mánaða fangelsisdóm fyrir fjársvik sem hann framdi með því að blekkja nokkra einstaklinga til þess að afhenda sér 74 milljónir króna. Í dómnum, sem staðfestur var af Landsrétti, segir að brot Einars hafi verið úthugsuð, brotavilji Einars einbeittur og þau staðið yfir í langan tíma. Þá sagði þar að hann ætti sér engar málsbætur.
Fengu þeir þá meðal annars styrk frá Tækniþróunarsjóði til þess að þróa áfram sólarselluhugmyndir svipuðum og þeim sem þeir seldu á Kickstarter. Þrátt fyrir milljónir í styrki og fjárfestingar bólaði aldrei neitt á sólarsellu framleiðslunni. Raunar sagði Stundin að hugmynd bræðranna bryti í bága við náttúrulögmál og framleiðslan væri þar með ómöguleg.
Zuistafléttan
Aðkoma bræðranna að Zuistahreyfingunni var einnig mikið til umræðu á liðnum árum. Munu bræðurnir hafa tekið félagið yfir með loforðum um að trúfélagsgjaldið sem rennur úr ríkissjóði yrði greitt til skráðra meðlima að frádregnu umsýslugjaldi nokkurs konar. Trúfélagið sótti þá um að fá lóð úthlutaðri frá borginni undir musteri. Ekkert varð af musterinu og skráðir meðlimir fengu aldrei neitt greitt til sín.
Ríkið greiddi út tug milljóna til trúfélagsins, en hélt eftir öðrum greiðslum. Bræðurnir höfðuðu þá mál til þess að fá þær greiðslur út en kröfu þeirra var hafnað.
Zuistaflétta bræðranna er nú fyrir dómi, en ákæra yfir þeim var birt seint á síðasta ári. Þeir neituðu báðir sök við þingfestingu málsins í desember. Í ákærunni sem DV hefur undir höndum kemur fram að aðeins rúm milljón sé eftir á reikningum félagsins af um 85 milljóna greiðslum ríkisins. Héraðssaksóknari krefst þess að gerðar verða upptækar um 50 milljónir sem sitja á reikningum bræðranna og á félögum þeim tengdum. Hvort pizza staðurinn nýi í Garðabænum sé á meðal þeirra eigna liggur ekki fyrir að svo stöddu.
