Guðmundur Guðmundsson landsliðsþjálfari í handbolta sagði í viðtali við RÚV eftir tapleikinn gegn Portúgal á HM í Egyptalandi að tæknimistök sem dreifðust milli leikmanna hefðu verið helsta orsök tapsins. „Við gerðum alltof marga tæknifeila í sókninni, 15 eru allt of mikið,“ sagði Guðmundur og benti á að liðið hefði líka farið illa með dauðafæri á mikilvægum kafla þegar tækifæri var til að snúa leiknum við.
„Við vissum að þetta var fiftý-fiftý leikur eins og maður segir, helmingslíkur, við vorum sjálfir okkur verstir, 25 mörk er í raun mjög lítið að fá á sig,“ sagði Guðmundur ennfremur en leikurinn tapaðist með tveggja marka mun, 25:23.
„Það pirrar mann að sjá þennan fjölda af mistökum, svona er ekki hægt að leyfa sér á stórmóti,“ sagði Guðmundur og benti á að leikirnir gegn Alsír og Marokkó yrðu ekki auðveldir. Að bæði liðin spiluðu villtan handbolta en væru orðin frambærileg. Enginn andstæðingur væri auðveldur á stórmóti sem þessu.
Ísland mætir Alsír á laugardagskvöld.
