Landspítalinn og rekstrarvandi hans hefur verið mikið í umræðunni að undanförnu og miðað við niðurstöður nýrrar könnunar er ljóst að vilji meirihluta þjóðarinnar er að meira fé verði veitt til rekstursins.

Samkvæmt könnun sem Prósent gerði fyrir Fréttablaðið þá vilja 57% þeirra sem taka afstöðu að miklu meira fé verði veitt til reksturs spítalans. 28% vilja að aðeins meira fé verði veitt til hans og 13% vilja halda fjárframlögunum óbreyttum.

2% vilja veita aðeins minna fé eða miklu minna fé til hans. Almennt séð eru konur hlynntari auknum fjárveitingum en 64% þeirra vilja veita miklu meira fé í reksturinn en hjá körlum er hlutfallið 50%.

Nær enginn munur er á afstöðu fólks sem býr á landsbyggðinni og þeirra sem búa á höfuðborgarsvæðinu. Þeir sem eru með mánaðarlaun upp á 800.000 krónur eða meira eru líklegri til að vilja halda fjárveitingunum óbreyttum en um 25% þeirra vilja að þær haldist óbreyttar eða lækki.

Menntun hefur lítil áhrif á afstöðu fólks en það gera stjórnmálaskoðanir hins vegar. Hjá stuðningsmönnum allra flokka vill meirihlutinn að meira fé verði veitt til spítalans. Hjá Sjálfstæðisflokknum vilja 42% stuðningsmanna að spítalinn fá óbreytt fjárframlög, 6% vilja að þau lækki, 20% vilja að spítalinn fái miklu meira fé og 32% að hann fái aðeins meira.