Íris Róbertsdóttir, bæjarstjóri Vestmannaeyjabæjar, harðneitar ásökunum Andrésar Þorsteins Sigurðssonar um einelti. Andrés hefur sagt starfi sínu lausu sem yfirhafnsögumaður Vestmannabæjar. Hann sakar Írisi um einelti í uppsagnarbréfi sínu til Framkvæmda- og hafnarráðs. Þetta meinta einelti varðar útilokun, upplýsingaskort og óréttmæta gagnrýni í garð Andrésar.
Andrés hefur starfað hjá höfninni í Vestmannaeyjum í15 ár en áður var hann skipstjóri.
Í viðtali við Mannlíf í dag þverneitar Íris þessum ásökunum og segir þær tilhæfulausar og órökstuddar. Hún segir:
„Viðkomandi starfsmaður var meðal umsækjenda um starf hafnarstjóra fyrr á árinu, en fékk ekki starfið. Framkvæmda- og hafnarráð réð annan einstakling í starfið, sem það mat hæfari en Andrés.“
Segir Íris hvergi hafa komið nálægt þessu ráðningarferli. „En í kjölfar þess að hann fékk ekki starfið virðist hann hafa ákveðið að ráðast að mér persónulega með órökstuddum dylgjum,“ segir Íris í viðtali við Mannlíf.
