Ekki liggur fyrir á þessari stundu hverja tónlistarmaðurinn Ingólfur Þórarinsson, öðru nafni Ingó Veðurguð, mun lögsækja vegna birtingar ásakana á hendur honum og þeirrar ákvörðunar þjóðhátíðarnefndar í Vestmannaeyjum að rifta samningi við hann um að stýra brekkusöng á Þjóðhátíð í Eyjum.
Í stuttu spjalli við DV segir Ingó að verið sé að fara yfir málin og ekki liggi fyrir á þessari stundu hverjir eigi eftir að fá stefnu frá honum. „Ég er að fara yfir þetta allt saman,“ segir Ingó.
Ekki liggur fyrir hvort Ingó lögsækir þjóðhátíðarnefnd fyrir að rifta samningnum um brekkusönginn. Því má slá föstu að einhverjir aðilar eigi yfir höfði sér meiðyrðamál vegna skrifa um Ingó á netinu undanfarna daga.
Um síðustu helgi birti baráttuhópurinn Öfgar síðan 20 nafnlausar reynslusögur þar sem Ingólfur er sakaður um allt frá óviðeigandi orðfæri upp í þráláta áreitni og upp í eitthvað sem gæti flokkast undir nauðganir. Tanja Ísfjörð hefur verið mest áberandi talsmaður hópsins og hún deildi hlekk á TikTok-myndbönd með frásögnunum á Twitter um helgina.
Skömmu eftir Twitter-fræðslu Tönju höfðu flestir netmiðlar birt fréttir um ásakanirnar. Sú spurning er áleitin hvort Ingólfur fari í mál við fjölmiðlana og þá hvort hann lögsæki alla fjölmiðla sem birtu fréttir um málið eða bara suma, þá væntanlega allt eftir framsetningu þeirra á efninu.
Ljóst er að Ingólfur er ekki bugaður maður þrátt fyrir þessa ágjöf en DV freistaði þess að fá að vita hvernig söngvaranum líður í þessum stormi mitt í hlýindum sumarsins. „Ég stend þetta af mér og fer alla leið með þetta. Þetta er komið út í ógeðslega hluti,“ segir Ingó.
Í viðtali við Vísir.is segist Ingó vera mjög ósáttur við ákvörðun þjóðhátíðarnefndar: „Ég er ósáttur við þessa ákvörðun en mun sækja allan minn rétt gagnvart þessu öllu, af fullum þunga.“ Hann segir ennfremur: „Ég hyggst spila öll mín gigg áfram og vinna mína vinnu.“
