ÍSÍ mun engin afskipti hafa af máli Þormóðs Árna Jónssonar, framkvæmdastjóra Júdósambands Íslands, sem þann 26. apríl síðastliðinn var sakfelldur fyrir líkamsárás fyrir Héraðsdómi Reykjavíkur.
Þormóður var yfirbugaður af um átta dyravörðum eftir snörp orðaskipti við rekstrarstjóra Kalda Bars. Er þarna var komið sögu hafði Þormóður engan lamið en dyraverðir á Lebowski Bar og Kalda Bar mátu það svo að hann væri til alls líklegur, réðust á hann og keyrðu hann niður í götuna.
Við þau átök sló Þormóður einn mannanna í andlitið en beitti sér að öðru leyti ekki í átökunum. Lögmaður hans hélt fram þeirri vörn að höggið hefði verið sjálfrátt sársaukaviðbragð handar hans við þeim tökum sem hann var settur í. Á þetta féllst ekki dómari og var Þormóður dæmdur í 30 daga skilorðsbundið fangelsi. Dómnum hefur verið áfrýjað til Landsréttar.
Er DV leitaði viðbragða hjá formanni Júdósambandi Íslands vegna málsins, Jóhanni Mássyni, neitaði hann að tjá sig.
DV leitaði viðbragða hjá Lárusi Blöndal, formanni ÍSÍ, og spurði hvort sambandið myndi aðhafast eitthvað vegna þessarar niðurstöðu. Lárus sendi DV eftirfarandi svar:
„ÍSÍ mun ekki hafa afskipti af þessu máli enda heyra starfsmannamál einstakra sérsambanda almennt ekki undir ÍSÍ.
Mér skilst að stjórn Júdósambandsins hafi tekið þá ákvörðun að láta kyrrt liggja á meðan málið er í áfrýjunarferli enda hefur sambandið mjög góða reynslu af Þormóði, jafnt sem starfsmanni og keppanda til fjölda ára.“
