Alma Möller bættist í dag í hóp fjórðungs Íslendinga sem hafa fengið að minnsta kosti eina sprautu af Covid-19 bóluefni. Hún fékk bóluefnið frá Pfizer. Klappað var fyrir Ölmu þegar hún mætti til bólusetningar í morgun, líkt og gert var fyrir kollega hennar úr þríeykinu, Þórólfi Guðnasyni, þegar hann var bólusettur.

Eins og þekkt er fékk Víðir Reynisson Covid í vetur og er því með ónæmi. Þríeykið allt hefur nú því ýmist verið bólusett eða smitast af sjúkdómnum.

Gríðarlegur fjöldi fólks er nú staddur í Laugardalshöllinni en þar fer bólusetning fram á höfuðborgarsvæðinu. Til stendur að bólusetja um 40 þúsund einstaklinga á Íslandi í þessari viku. Líklegt er að 6.500 verði bólusettir með Jansen í vikunni, og verða þeir því fullbólusettir með fyrstu sprautu. 14 þúsund fá Pfizer, 15 þúsund AstraZeneca og 4 þúsund fá Moderna.

Af myndunum af svæðinu í dag má sjá röðina teygja sig vel út úr höllinni og upp með fram bílastæðum hallarinnar. Fyrr í dag setti Lögreglan á höfuðborgarsvæðinu kort af bílastæðum á svæðinu inn á Facebook síðu sína og bað gesti hallarinnar í dag góðfúslega að nýta tækifærið og fá sér frekar göngutúr en að leggja ólöglega. Lögreglan hefur þó gefið það út að hún hyggist ekki sekta ökumenn bifreiða sem leggja ólöglega á svæðinu.

https://www.facebook.com/logreglan/posts/4116576368405880

Ernir Eyjólfsson fangaði myndirnar hér að neðan af stemningunni í höllinn í dag.