Brynjar Níelsson, þingmaður Sjálfstæðisflokksins, hefur verið mikið í umræðunni um sóttvarnaraðgerðir og fleira í kórónuveirufaraldrinum. Brynjar fékk boð í bólusetningu en hann fór þangað í dag og fékk sprautuna.

„Í dag var ég leiddur eins og rolla í rétt í bólusetningu. Allt til fyrirmyndar í því. Ég varð ekki var við áberandi lófaklapp eða fögnuð þegar ég gekk í salinn, sem kom svo sem ekkert á óvart,“ segir Brynjar í færslu sem hann birti á Facebook-síðu sinni í dag.

Brynjar segist hafa hitt nánast allan árganginn sem var með honum í barnaskóla og menntaskóla. „Leið eins og ég væri kominn í reunion án áfengis. Skólafélagarnir gömlu lofuðu allir að kjósa mig næst, líka vinstri róttæklingarnir úr MH,“ segir Brynjar.

Hann spurði svo konuna sem sprautaði hann um hugsanlegar afleiðingar og aukaverkanir þegar hann fékk sprautuna. „Hún sagði ekki óalgengt að menn væru með óráði fyrsta sólarhringinn eftir sprautu en bætti við að það yrði kannski ekki mikil breyting fyrir mig.“