Þáttastjórnandinn Tucker Carlson situr nú undir mikilli gagnrýni vegna framgöngu sinnar í þætti sínum á sjónvarpsstöðinni Fox News. Tucker Carlson, sem þykir einn sá allra íhaldssamasti á mjög svo íhaldssamri sjónvarpsstöð, var þar með lögreglumanninn fyrrverandi Ed Gavin í viðtali þar sem þeir ræddu almennt um stöðu lögreglunnar í Bandaríkjunum í kjölfar dómsins yfir Derek Chauvin, sem myrti George Floyd í maí í fyrra. Myndband náðist af lögreglumanninum liggja á hálsi Floyds með þeim afleiðingum að hann lést. Reiði almennings kveikti mótmælaöldu sem víða breyttust í óeirðir, raunar þær kostnaðarsömustu í sögu Bandaríkjanna.

„Hver vill vera lögreglumaður núna,“ var fyrsta spurnin Carlson til Gavin og má sjá að hún hreyfði við Gavin, enda ljóst hvert Carlson stefndi. Svör Gavins þóttu málefnaleg og yfirveguð og útskýrði hann meðal annars að hann hefði beitt líkamlegu valdi yfir 500 sinnum á ferli sínu án þess að viðkomandi missti meðvitund. Skýrt væri, sagði hann, að Chauvin hefði farið langt út fyrir valdbeitingarvald sitt. Þá sagði Gavin að efla þyrfti þjálfun lögreglumanna í Bandaríkjunum.

Carlson tók þessu illa, greip orðið af lögregluþjóninum, sló öllu saman upp í grín og hló svo kvikindislega að eigin brandara. Þegar Gavin reyndi svo að svara skotum þáttastjórnandans klippti hann á viðtalið og snéri sér að næsta máli á dagskrá. Myndbandið má sjá hér að neðan.